ಒಂದು ಮಾತು - ಕೇತಕೀವನ - ಡಿವಿಜಿ

ಒಂದು ಮಾತು - ಕೇತಕೀವನ - ಡಿವಿಜಿ

ಕಾಣದಿರೆ ಕೊರಗುವುದು; 

ಕಾಣುತಿರೆ ಕೆರಳುವುದು : 

ಎನ್ನೆದೆಯು ಚೆನ್ನರಸಿ ನಿನ್ನನೆಳಸಿ, 

ಏನು ಬೇಹುದೊ ಅದಕೆ 

ನೀನರಿಯಲಹುದದನು 

ತಳ್ಕೈಸು ಬಾಳ್ಕೆ ಬೇಳ್ಪರುಮೆಯಿರಿಸಿ.

*********************

ಪ್ರೇಯಸಿಯ ಸನಿಹವನು ಹಂಬಲಿಸುತ್ತಿರುವ ಪ್ರೇಮಿಯು  ಪ್ರೇಮವನು ಬಲಿಕೊಡಬೇಡ ಎಂದು ಅಳಲನ್ನು ತೋಡಿಕೊಳ್ಳುತ್ತಿದ್ದಾನೆ.

ನಿನಗಾಗಿ ಹಂಬಲಿಸುತ್ತ ಸೊರಗಿರುವ ನಿನ್ನರಸ ನಾನು ನಿನ್ನನ್ನು ಕಾಣದೆ ಕೊರಗುತ್ತಿರುವೆ.

ನಿನ್ನ ಸನಿಹದಿಂದ ಈ ನನ್ನ ತನುಮನಗಳು ಅರಳುತ್ತ ಕೆರಳುತ್ತ ಕುಣಿಯಲಾಶಿಸುವುದು.

ಈ ನನ್ನ ಹೃದಯವು ಚೆನ್ನರಸಿಯಾದ ನಿನ್ನ ಸಾಮೀಪ್ಯವನ್ನೆಳಸುತ್ತ , ನಿನ್ನ ಸನಿಹಕ್ಕಾಗಿ ಬೇಹುಗಾರಿಕೆಯಲ್ಲಿ ನಿರತನು. ಒಲವಿನಸೆಳೆತವೆಂಬುದು ಅದೆಂತಹ ಗೂಢಚಾರನೆಂಬುದನ್ನು ಚೆನ್ನನ್ನೇ ಅರಸುತ್ತಿರುವ ನೀನೂ ಬಲ್ಲೆ.

ನಮ್ಮಬಾಳುವೆಯ ಸುವರ್ಣಸೇತುವೆಯಾಗಿ ಬಾ! ನಿನ್ನ ಬಿಸಿಯಪ್ಪುಗೆಯು ಬಾಳಿಗೆ ಸಾರ್ಥಕತೆಯನ್ನುಂಟುಮಾಡಲಿ. ನಮ್ಮ ಒಲವಿನದೀಪವು ದಿವ್ಯ ಸಮರ್ಪಣೆಯ ಯಜ್ಞವಾಗಲಿ. ವ್ಯರ್ಥವಾದ ಬಲಿಯಾಗದಿರಲಿ.

ಭಾವಾನುವಾದ :  ಕೊಕ್ಕಡ ವೆಂಕಟ್ರಮಣ ಭಟ್ ಮಂಡ್ಯ