ಸುಖವೆಲ್ಲಿ? - ಕೇತಕೀವನ - ಡಿವಿಜಿ

ತುಂಬುಸುಖವೆಲ್ಲಿಹುದು 

ತುಂಬಿಯೇ ನಿನಗೆ? 

ಸೂನದುದ್ಯಾನದೊಳೊ, 

ಜೇನುಗೂಡಿನೊಳೊ? 

ಅರಸುತಲೆವುದು ಸುಖವೊ, 

ಅರಲ ನೆಲೆ ಸುಖವೊ? 

ಪಾಡಿಪಾರ್ವುದು ಸುಖವೊ? 

ಕೂಡಿಡಲು ಸುಖವೊ 

ಬಳಸುತಿರುವುದೆ ಸುಖವೊ, 

ಗಳಿಸುವುದು ಸುಖವೊ? 

ಕಣಜ ಕಾಯ್ವುದು ಸುಖವೊ, 

ಉಣುವುದೇ ಸುಖವೊ? 

ಹಲ ಬಗೆಯ ಹೂ ಸುಖವೊ, 

ಬಲು ರಾಶಿ ಸುಖವೊ? 

ಅಧಿಕ ಸುಖವೆಲ್ಲಿಹುದು 

ಮಧುಕರನೆ ನಿನಗೆ?

***************

ಮಧುಕರನಂತೆ ಸುಖಕ್ಕಾಗಿ ಹಂಬಲಿಸಿ ಅಲೆದಾಡುವ ಜನರ ಮನಸ್ಸನ್ನು ಕವಿ ಗುಂಡಪ್ಪನವರಯ  ತುಂಬಿಯ ಪ್ರತಿಮೆಯದ್ವಾರಾ ಬಣ್ಣಿಸುತ್ತಾರೆ.

     ಹೂವಿಂದ ಹೂವಿಗೆ ಹಾರಾಡುವ ತುಂಬಿಯೇ,  ತುಂಬುಸುಖವೆಂಬುದು ಎಲ್ಲಿದೆ!? ಬಣ್ಣಗಳ ವೈವಿಧ್ಯಮಯವಾದ ಹೂಗಳನ್ನರಳಿಸಿಕೊಂಡ ಉದ್ಯಾನವನದಲ್ಲಿ ಪೂರ್ಣತೃಪ್ತಿಯನ್ನು ನೀಡುವ ಸುಖವಿದೆಯೇ! ಇದ್ದರೆ ನೀನು ಮತ್ತೆ ಮತ್ತೆ ಉದ್ಯಾನದಿಂದ ಉದ್ಯಾನಕ್ಕೆ ಹಾರಾಡುತ್ತಿರಲಿಲ್ಲ.

ಹೂಗಳ ಇನಿತಿನಿತು ಮಕರಂದವನ್ನುಂಡರೂ ತೃಪ್ತಿಯಾಗದೆ ಜೇನುಹುಟ್ಟಿಯ ಸುತ್ತ ರೋಲಂಬಗೊಡುವ ನಿನಗೆ ಜೇನುಹುಟ್ಟಿಯಲ್ಲಿ  ತುಂಬುಸುಖ ಲಭಿಸುವುದೇ! ಊಹೂಂ! 

ಇಲ್ಲ.

ಹೂವಿಂದ ಹೂವಿಗೆ, ಗಿಡದಿಂದ ಗಿಡಕ್ಕೆ ಹಾರಾಡುತ್ತಾ ಅಲೆದಾಡುತ್ತಾ ಸವಿ ಸುಖಕ್ಕಾಗಿ ಅಲೆದಾಡುವುದರಿಂದ ಸುಖವಿಲ್ಲ. ಅರಳಿರುವ ಹೂಗಳಾಸರೆಯು ಸುಖದ ನೆಲೆಯೇ!  ಹಾಗಿದ್ದರೆ ನೀನು ಹೀಗೆ ನಿತ್ಯ ನಿರಂತರ ಅಲೆದಾಡುತ್ತಿರಲಿಲ್ಲ.

ಹಾಡುತ್ತಾ ಹಾಡುತ್ತಾ ಸುತ್ತೆಲ್ಲಾ ಸುಳಿದಾಡುವುದೇ ಸುಖವೋ! 

ಜೇನುಹುಳದಂತೆ ಸಂಗ್ರಹಿಸಿ ಕೂಡಿಡುವುದರಲ್ಲಿ ಸುಖವಿದೆಯೇ! 

ಒದಗಿಬಂದುದನ್ನು ಸವಿಯುವುದೇ ಸುಖವೇ!?

ಗಳಿಸುವುದು ಸುಖವೋ!? .ಗಳಿಸಿದ್ದನ್ನು ಉಳಿಸುವುದಕ್ಕಾಗಿ ಹೆಣಗಾಡುವುದು ಸುಖವೋ!?   ಅಥವಾ  ಇಂದು ಇಂದಿಗೆ ನಾಳೆ ನಾಳೆಗೆ ಎಂಬಂತೆ  ಗಳಿಸಿದ್ದನ್ನು  ಭುಂಜಿಸುವುದೇ ಸುಖವೇ!?  ನಾನಾಬಗೆಯ ಹೂಗಳು ಸುಖದಾಗರವೇ!  ಹೂಗಳ ರಾಶಿಯ ದರ್ಶನವೇ ಸುಖವೋ?  ಮಧುವನ್ನು ಹೀರಬಯಸುವ ತುಂಬಿಯೇ, ಅಲೆದಾಟದಲ್ಲಿ ಎಲ್ಲಿ ಹೆಚ್ಚು ಸುಖವನ್ನು ಕಂಡಿರುವೆ!? 

ಪಾತರಗಿತ್ತಿಯು ಹೂವಿಂದ ಹೂವಿಗೆ ಹಾರಡುತ್ತಾ, ಹೂಗಳಲ್ಲಿರುವ ಮಕರಂದವನ್ನು ಹೀರಬಯಸಿದಂತೆ  ಮನುಷ್ಯನು ಹೊನ್ನು  ಹೆಣ್ಣು  ಮಣ್ಣುಗಳಲ್ಲಿ ಸುಖವಿದೆಯೆಂಬ ಭ್ರಮೆಯಿಂದ ಇವುಗಳ ಸುತ್ತ ಗಿರುಕಿಹೊಡೆಯುತ್ತಾ ಸುಖದ ಮರೀಚಿಕೆಯನ್ನು ಬೆಂಬತ್ತಿ, ಅಲೆದಾಡುತ್ತಲೇ ದಿನಮಾನಗಳನ್ನು  ಹೇಗೋ ಕಳೆಯುತ್ತಿದ್ದಾನೆ.

~~~~~~~~~~~~~~~~

ಸೂನ = ಹೂವು, 

ಅಲರು= ಹೂವು

ಭಾವಾನುವಾದ: ©ಕೊಕ್ಕಡ ವೆಂಕಟ್ರಮಣ ಭಟ್ ಮಂಡ್ಯ