ನಗುವ ಬಾಲೆ - ಕೇತಕೀವನ - ಡಿವಿಜಿ

ನಗುವ ಬಾಲೆ ಗುಲಾಬಿ- 

ಸೊಗವ ಚೆಲ್ಲುವ ಬಾಲೆ, 

ಭಗವಂತನಣುಲೀಲೆ. 

ಇಂದೊ ನಾಳೆಯೊ ನೋಡು, 

ಮುದುರಿ ಬೀಳುವುದು, 

ಎದೆಯ ಸೀಳುವುದು. 

ಸುಧೆಯ ಪಾನವೊ ಪ್ರೇಮ- 

ಬದುಕ ಬೆಳಗಿಪ ಪಾನ, 

ವಿಧಿಯ ಮಧು ಸಂಧಾನ- 

ಇಂದೊ ನಾಳೆಯೊ ನೋಡು, 

ಬತ್ತಿ ಬರಿದಹುದು, 

ಚಿತ್ತವಿರಿಯುವುದು. 

ಮಲರುದುರಿದೆದೆಯಿರಿತ,
ಒಲವಿಮರಿದೆದೆಬಿರಿತ, 

ಚೆಲುವೊಣಗಿದೆದೆಸಿಡಿತ 

ಕಾಣದನೆ ಸುಖಿಯೋ! 

ಇನಿಗನಸ ಬಿಸುಸುಯ್ದು 

ನೆನೆವವನೆ ಸುಖಿಯೋ

****************************

'ನಗುವ ಹೆಣ್ಣನ್ನು ನಂಬಬೇಡ' ಎಂಬ ಹಿರಿಯರ ಅನುಭವಾಮೃತಮಾತು ಸುಳ್ಳಲ್ಲ.

ನಗುವ ಹೆಣ್ಣಿನ ನಗುವನ್ನು  ನಂಬಿ ಸಾಮ್ರಾಜ್ಯಗಳೇ ಅಡಿಮೇಲಾಗಿವೆ. ಹೆಣ್ಣಿನ ನಗುವು ಸಾಮ್ರಾಜ್ಯವನ್ನು ಕಟ್ಟಿದ್ದೂ ಇರಬಹುದು.

  ನಗುವ  ಬಾಲೆಯು ಗುಲಾಬಿಚೆಲುವನ್ನು  ಚೆಲ್ಲುವ ಕೋಮಲೆ!  ಸುಮಸುಂದರಿಯಾದ ನಗುವ ಬಾಲೆ ಭಗವಂತನು ಸೃಷ್ಟಿಸಿದ ಅತಿಸೂಕ್ಷ್ಮವಾದ ಕುಸುರಿಕಲೆಯ ಲೀಲೆ! 

 ಈ ಕ್ಷಣವೋ ಮುಂದಿನ ಕ್ಷಣವೋ ನಾಳೆಯೋ ಮುದುರಿ ಬೀಳುವುದು ನಿಶ್ಚಿತ! ಮುದುಡಿದ ಬಾಲೆಯ ಹೀನಾವಸ್ಥೆಯನ್ನು ಕಂಡು ನೆಚ್ಚಿ ಮೆಚ್ಚಿದವರ ಎದೆಸೀಳುವುದೂ ನಿಶ್ಚಿತ! 

 ನಗುವ ಬಾಲೆಯು ಬದುಕನ್ನು ಬೆಳಗಿಸಿದ ಪ್ರೇಮಪಾನದ ಅಮೃತ! 

ವಿಧಿಯ ಲೀಲೆಯನ್ನು  ಪ್ರೇಮವರಿಯದು. ಪ್ರೇಮಿಯೂ ಅರಿಯನು. ವಿಧಿಯ ಮಧುಸಂಧಾನವು ಇಂದೂ ಇರಬಹುದು.  ನಾಳೆಯೇ ಇರಬಹುದು. ಬಲ್ಲವರಿಲ್ಲ. ಪ್ರೇಮದೀಪದ ಬತ್ತಿಯ ಆಯುಷ್ಯ ಈ ಕ್ಷಣವೋ ಆಕ್ಷಣವೋ ಬರಿದಾಗಬಹುದು. ಪ್ರೇಮದ ಬತ್ತಿ ಬರದಾದ ಕ್ಷಣದಲ್ಲಿ ಚಿತ್ತ ಇರಿಯುವುದೂ ದಿಟ! 

 ನಗುವಬಾಲೆಯೆಂಬ ಗುಲಾಬಿ ಎಸಳುಗಳು ಒಣಗಿದಾಗ ಪ್ರೇಮಿಯ ಎದೆಗೆ ಗುಲಾಬಿಗಿಡದ ಮುಳ್ಳುಗಳೇ ಚುಚ್ಚಿದಂತಹ ವೇದನೆ ! ಒಲವು ಬತ್ತಿದಡೆ ಪ್ರೇಮಿಯ ಎದೆಯ ಉರಿತ ಅಸದಳವು. ಚೆಲುವು ಒಣಗಿದರೆ ಎದಸಿಡಿತದ ವೇದನೆ!  ಇಂತಹ ವೇದನೆಯನ್ನು ಅನುಭವಿಸಿದವನು ಸುಖಿ! ನಗುವಬಾಲೆಯ ಬಗೆಗೆ ಚೆಲುವಿನ ಹಗಲುಗನಸನ್ನು  ಕಟ್ಟಿಕೊಳ್ಳದವನು ಸುಖಿ! ಹಗಲುಗನಸಿನ‌ಬಗೆಗೆ ನೆನೆಸಿಕೊಂಡವನೇ ಸುಖಿ! ಭಾವಗ್ರಹಣ: ಕೊಕ್ಕಡ ವೆಂಕಟ್ರಮಣ ಭಟ್ ಮಂಡ್ಯ