ಸುಶೀಲೆಗೆ-೨ - ಕೇತಕೀವನ - ಡಿವಿಜಿ

ಸುಶೀಲೆಗೆ-೨ - ಕೇತಕೀವನ - ಡಿವಿಜಿ 

ನೂರಾರು ಹೆಣ್ಣುಗಳ 

ನೂರು ಬಗೆ ಚೆನ್ನುಗಳ 

ಸಾರವರಿತೀ ಕಣ್ಗೆ-ಓ ಸುಶೀಲೆ; 

ರುಚಿ ನಿನ್ನ 

ಶುಚಿಕಾಂತಿ-ಸುಮಕೋಮಲೆ. 

ವಿನಯ ತುಂಬಿದ ವದನ 

ಕನಿಕರಿಪ ತಿಳಿನಯನ 

ಇನಿಗೊರಲ ಮೃದುಗಾನ-ಉಚಿತವೆಲ್ಲ; 

ಮಧುರತೆಯ 

ಬದುಕಿಗದು-ಸಹಜವೆಲ್ಲ. 

ಪಾರಿಜಾತವ ಪೋಲ್ವೆ 

ತಾರಗೆಯವೊಲು ಬಾಳ್ವೆ 

ಚಾರುನಮ್ರತೆಯಿಂದ- ಓ ಸುಶೀಲೆ; 

ಸಾತ್ತ್ವಿಕದ 

ತೃಪ್ತಿಯಿಂ-ಗೀತಕುಶಲೆ. 

ಕೋರಿಕೆಯ ಕೆಣಕುವೊಲು 

ಗೌರವವನುಂ ಗಳಿಪ 

ಸ್ವಾರಸ್ಯ ನಿನ್ನದೆಲೆ-ಕವಿಮನೋಜ್ಞೆ; 

ಸೌಮ್ಯದಾ 

ರಮ್ಯತೆಗೆ-ನೀಂ ಪ್ರಮಾಣೆ. 

ನಿನ್ನ ಮೆಲುದನಿಯಿಂಪು 

ನಿನ್ನ ನಸುನಗು ತಂಪು 

ನಿನ್ನ ನಲುಮೆಯಲಂಪು-ಓ ಸುಶೀಲೆ 

ಪಿಡಿದೆನ್ನ 

ಹೃದಯವನು-ಗಾನಲೋಲೆ. 

ನಾನಲೆವ ಕಡೆಯಲೆದು 

ನಾನಿರ್ಪೆಡೆಯೊಳಿರ್ದು 

ನನ್ನ ಜೀವದಿ ನೆರೆದು-ನಿನ್ನ ನಲುಮೆ 

ನನ್ನೆಲ್ಲ 

ನೀನೆನಿಪುದೆನ್ನ ಮನಕೆ. 

ನೆನೆನೆನೆದು ಸುಖಿಪೆ ನಿ- 

ನ್ನಿನಿಯ ಭಾವಂಗಳನು 

ಕನಿಕರಿಪೆ ನೀನೆಂದು-ಓ ಸುಶೀಲೆ 

ತಾಳಿರುವೆ 

ಬಾಳನಾಂ-ಮಂಜುಲೀಲೆ. 

ಕಾದುಕಾದಿಷ್ಟು ದಿನ 

ಪೋದೆಲ್ಲ ಕಡೆ ನಿನ್ನ 

ಸಾಧುತನವನೆ ನೆಚ್ಚಿ-ನಲಿದೆ ನಾನು. 

ಕುದಿಯುತಿಹು- 

ದೆದೆಯ ರಸ ಫಲವದೇನು? 

ಕೆಳೆಯ ನೀಂ ಜರಿಯುವೆಯ? 

ನಲುಮೆಯನೆ ಪರಿಯುವೆಯ? 

ಒಲಿದೆದೆಯ ಮುರಿಯುವೆಯ?-ಓ ಸುಶೀಲೆ 

ಬದುಕಿಸೆಯ 

ಬಕುತನನು-ಚಾರುಶೀಲೆ?

#ಕೇತಕೀವನ #ketakivana #DVG #DVGundappa #ಡಿವಿಗುಂಡಪ್ಪ #ಡಿವಿಜಿ

To receive the posts on your personal email, pls subscribe to https://groups.google.com/g/todayskagga