ಜ್ಞಾಪಕ - ಕೇತಕೀವನ - ಡಿವಿಜಿ

(೧)

ಬಿಸುಸುಯ್ಯುತಿದೆ ಗಾಳಿ
ಮರಮರಕೆ ಸಾರಿ.
ಸಸಿ ಮೊಗವ ಮುಚ್ಚಿಹನು
ಮುಗಿಲ ಮರೆ ಸೇರಿ.
ಏತಕೋ ತಪಿಪುದೆದೆ; ಕೊರಲನೊತ್ತುತಿದೆ.

ಕೈಯೊಳೆತ್ತಿದುದಿಲ್ಲ;
ಒಡನಾಟವಿಲ್ಲ;
ದನಿಯ ಕೇಳಿದುದಿಲ್ಲ;
ನೋಡಿದುದುಮಿಲ್ಲ.
ಆರೊ ಅವನೆಂದಿರ್ದೆನೆನ್ನ ಶಿಶುವೆನದೆ

ಅಂದೆನ್ನ ಮನೆಯೊಳಗೆ
ನೊಂದಿದಾ ಬೆಳಕು
ಸಂದಿರ್ಪುದಿನಿಸಾನು-
ಮಿಂದಿವನೊಳೆನುತೆ
ಬಗೆದು ದುಗುಡವನಿನಿತು ಮರೆತು ನಾನಿರ್ದೆ.

ಬಾಳ ತೊಳೆವಶ್ರುವಿನ
ಕಲಶವಿವನೆನಗೆ;
ಕಾಲನವನನು ಸೆಳೆದು
ಗಳಿಸುವುದದೇನು?
ಆದೊಡಂ ಪ್ರಾಕ್ತನದ ಬಿದಿಯದೆಂತಿಹುದೋ!

ಎತ್ತಲಾನುಂ ಬಾಳ್ಗೆ
ಅಳಲ ಪಸುಳೆಯವಂ;
ಎತ್ತಿ ಕಾಪಿಡಲವನ-
ನಾರಾನುಮೊಲವಿಂ
ಎನುತ ಪರಸುತ್ತಿರ್ದೆ ಭಯದ ಮೌನದಲಿ.

(೨)

ಎಂತಿಹುದೊ ಎಂದೆನಿಪ
ಚಿಂತೆಯಿನ್ನಿಲ್ಲ;
ಅಳಲ ಶಿಶುಗಿನ್ನಿನಿಸು-
ಮಳಲೆನಿಪುದಿಲ್ಲ;
ಆದೊಡಂ ತಪಿಪುದೆದೆ; ಕೊರಲನೊತ್ತುತಿದೆ.

ಬಿಸುಸುಯ್ಯುತಿದೆ ಗಾಳಿ
ಮರಮರಕೆ ಸಾರಿ;
ಸಸಿಮೊಗವ ಮುಚ್ಚಿಹನು
ಮುಗಿಲ ಮರೆ ಸೇರಿ;
ಕಣ್ಗಳಲಿ ಮಂಜೇನೊ; ಮನದಿ ಧಗೆಯೇನೋ!