ಜೀವ-ಸಾವು - ಕೇತಕೀವನ - ಡಿವಿಜಿ

ಕಡಲ ಬಳಿ ಮಣಲಂತೆ
ಒಡಲ ಬಳಿ ನೆಳಲಂತೆ
ಹೂವಿನಲಿ ಕಾಯಂತೆ
ಹುತ್ತದಲಿ ಹಾವಂತೆ
ಮೆರೆಯುತಿದೆ ಮರೆಯಲಿದೆ
ಸಾವು ಜೀವದೊಡಂ.

ಕಾಂತಿಯಲಿ ಬಿಸಿಯಂತೆ
ತಂತಿಯಲಿ ದನಿಯಂತೆ
ಹಾಲಿನಲಿ ಕೆನೆಯಂತೆ
ಹಣ್ಣಿನಲಿ ಕೃಮಿಯಂತೆ
ಮೆರೆಯುತಿದೆ ಮರೆಯಲಿದೆ
ಸಾವು ಜೀವದೊಡಂ.

ಮುಗಿಲಿನಲಿ ಸಿಡಿಲಂತೆ
ಸವಿದೆಯಲಿ ಶಿಖಿಯಂತೆ
ಇರುಳಿನಲಿ ಕಳನಂತೆ
ಬಸಿರಿನಲಿ ಶಿಶುವಂತೆ
ಮೆರೆಯುತಿದೆ ಮರೆಯಲಿದೆ
ಸಾವು ಜೀವದೊಡಂ.

ಅದೇಕೆ? - ಕೇತಕೀವನ - ಡಿವಿಜಿ

ಅದೇಕೆ? - ಕೇತಕೀವನ - ಡಿವಿಜಿ

ತಣ್ಗದಿರನೆಸೆಯುತಿರೆ
ಗಾಳಿಯಳಲೇಕೆ?
ಕಣ್ಗಳಿಗೆ ಹಬ್ಬಮಿರೆ
ಎದೆ ಬೇವುದೇಕೆ?

ಉಡುಗಣವು ನಗುತಲಿರೆ
ಕಡಲ ಮೊರೆಯೇಕೆ?
ಒಡಲಿಗೈಸಿರಿಯಿರಲು
ಎಡರಾತ್ಮಗೇಕೆ?

ತರಣಿ ಬೆಳಕೀಯುತಿರೆ
ತಿರೆಯ ಮಬ್ಬೇಕೆ?
ಮತಿ ನಯವನುಸಿರುತಿರೆ
ಮನವಲೆವುದೇಕೆ?

ಹೊರಗಿಹುದು ಒಳಗಿಹುದ
ತಣಿಸದಿಹುದೇಕೆ?
ಒಳಗಿಹುದು ಹೊರಗಿಹುದ
ಸೈಸದಿಹುದೇಕೆ?

ಧ್ರುವ - ಕೇತಕೀವನ - ಡಿವಿಜಿ

ಪ್ರಶ್ನೆ:

ನೋಡುತಿರ್ಪುದದೇನು
ನಿಶಿನಿಶಿಯೊಳೆವೆಯಿಡದೆ?
ಮೂಡುತಿರ್ಪುದದೇನು
ಮಿಸುಕದೊಂದೆಡೆ ನಿಂತು?
-ಅದನುಸಿರು, ಧ್ರುವರಾಯ;
ಬದುಕದುವೆ ಜೀಯ?

ಉತ್ತರ:

ಕಾವಲಿಹುದೊಂದೆಡೆ
ಅಂದೊಂದೆ ಉಜ್ಜುಗವೆನಗೆ
ನೀವಿಡುವ ನಚ್ಚುಗೆ
ಅದೊಂದೆ ಮನ್ನಣೆಯೆನಗೆ
-ಕೇಳು ಮಗು ನೀನಿದನು-
ಬಾಳ ನೋಂಪಿಯ ಹದನು.

ಕರ್ಮದ ರಾಹು - ಕೇತಕೀವನ - ಡಿವಿಜಿ

ಎನ್ನ ಕರುಮದ ರಾಹು
ನಿನ್ನ ಕರುಣೆಯ ರವಿಯ
ಬನ್ನವಡಿಸಿರಲಾಗ
ನಿರ್ಣಯವದೆಂತೋ-
ಎನ್ನ ಬಲುಹೋ ಪಿರಿದು ನಿನ್ನ ಬಲುಹೋ?

ತಿರೆಗಾಳಿ ಗಗನಗಳು
ಮೊರೆಯುತಿರೆ ನಿನ್ನುರುಬ
ಮರೆಯಿಪ್ಪುವದನೆನ್ನ
ಕೊರತೆಗಳೆ ಎನಗೆ-
ಎನ್ನ ಬಲುಹೋ ಪಿರಿದು ನಿನ್ನ ಬಲುಹೋ?

ಬಿದಿಯಟ್ಟಹಾಸಕಾ-
ನೆದೆಯನೊಡ್ಡಿರಲಂದು
ಇದಿರೊಳಿರದೆತ್ತಲೋ
ಹುದುಗಿರುವೆ ನೀನು-
ಎನ್ನ ಬಲುಹೋ ಪಿರಿದು ನಿನ್ನ ಬಲಹೋ?

ಸೊಗಸಾವುದು? - ಕೇತಕೀವನ - ಡಿವಿಜಿ

ಘನದ ಮಿಂಚದು ಸೊಗಸೊ
ಮನೆಯ ಸೊಡರಿದು ಸೊಗಸೊ
ಸಸಿಯ ಬೆಳಕದು ಸೊಗಸೊ
ಪಸುಳೆ ನಗು ಸೊಗಸೋ
ನೀ ಮಾಡಿಹುದೆ ಸೊಗಸೊ ಮಾಡಿಪುದೆ ಸೊಗಸೋ?

ತಿಳಿನೀರ ತೊರೆ ಸೊಗಸೊ
ತಿಳಿದವರ ಮನ ಸೊಗಸೊ
ಗಿರಿಯಟವಿಗಳೆ ಸೊಗಸೊ
ಪುರವೀಧಿ ಸೊಗಸೋ
ನೀ ಮಾಡಿಹುದೆ ಸೊಗಸೊ ಮಾಡಿಪುದೆ ಸೊಗಸೋ?

ಕಾಯ ಯಂತ್ರವೆ ಸೊಗಸೊ
ರಾಯತಂತ್ರವೆ ಸೊಗಸೊ
ಮೊರೆವ ಕಡಲದು ಸೊಗಸೊ
ಕೆರೆ ಬಾವಿ ಸೊಗಸೋ
ನೀ ಮಾಡಿಹುದೆ ಸೊಗಸೊ ಮಾಡಿಪುದೆ ಸೊಗಸೋ?

ತನಿವಣ್ಣ ಸವಿ ಸೊಗಸೊ
ಮನೆವೆಣ್ಣೊಲವೆ ಸೊಗಸೊ
ತರಣಿತೇಜವೆ ಸೊಗಸೊ
ಗುರುಕೃಪೆಯೆ ಸೊಗಸೋ
ನೀ ಮಾಡಿಹುದೆ ಸೊಗಸೊ ಮಾಡಿಪುದೆ ಸೊಗಸೋ?

ಷೆಲ್ಲಿಯ ಸಂಕಟ - ಕೇತಕೀವನ - ಡಿವಿಜಿ

ಸೊಗಸುಗಳಿನರಳುತಿರ್ದುವು ಕಣ್ಗಳಂದು
ಪೊಗಳಿಕೆಯಿನರಳುತಿರ್ದುವು ಕಿವಿಗಳಂದು
ಜಗದೊಲವಿನರುಳುತಿರ್ದುದು ಹೃದಯವಂದು
ಇಂದಿಲ್ಲವಂತೆನಗೆ ಅಂತಿನಿಸುಮಿಲ್ಲ!

ಮನವುಬ್ಬದಾವ ಸಾಸಂಗಳಿಗಮಿಂದು
ತನುವುಬ್ಬದಾವ ಭೋಗಂಗಳಿಗುಮಿಂದು
ನೆನಪುಬ್ಬದಾವ ನಲ್ಗತೆಗಳಿಗಮಿಂದು
ಅಂದಾಗುತಿರ್ದುದಂತಿದೆನಗೆ ಬೇರೆ!

ಓ ಜಗವೆ, ಓ ಜೀವ, ಓ ಕಾಲಪುರುಷ
ಸೋಜಿಗವಿದೇನೆತ್ತಲಾ ನಿಮ್ಮ ಹರುಷ
ತೇಜವನು ನುಂಗಿರುವುದೇಂ ಜರೆಯ ಕಲುಷ
ಬಾಡಿಪೋದುದೆ ಜವ್ವನವು ಪೋದುದಕಟಾ!

ಬಾರದಾ ಹರಣಗಳ ತಾರುಣ್ಯವಿನ್ನು
ತೋರದೀ ಭೂತಲದಿ ಮಾಧುರ್ಯವಿನ್ನು
ಸಾರದೆನ್ನೊಡಲನಾ ಪೊಸ ಬೆಡಂಗಿನ್ನು
ಓಡಿಪೋದುದು ಬೆಡಗು ಮಾಯವಾಯ್ತಕಟಾ!

ಪಗಲಿಂದಮಿರುಳಿಂದಮೊಂದು ಸಂತಸವು
ಜಗವ ತೊರೆದೆತ್ತಲೋ ಸಾರಿಹುದು ದಿಟವು
ಮಗುಳ್ದಿತ್ತ ಬಾರದಾ ದಿವ್ಯ ವೈಭವವು
ಹಾ! ಬಾರದೆಂದುಮಾ ಸಿರಿ ಬಾರದಕಟಾ!

ನೂತನ ವಸಂತ ಶಾರದ ಶಿಶಿರ ಮಾಸ-
ವೈತಂದು ಚಕ್ರಗತಿಯಲಿ ಮುಗಿದಳಲ
ಚೇತಸದಿ ತುಂಬುವುದು ಕುಡದಿನಿಸು ಮುದವ
ಹಾ! ನೀಡಲಾರದದು ಮುದವ ನೀಡದು ಹಾ!

ಒಲವೆಂದರೆ? - ಕೇತಕೀವನ - ಡಿವಿಜಿ

ಹೊನ್ನ ಕಡಗಗಳಿಂದ
ರನ್ನದೊಡವೆಗಳಿಂದ
ಬಣ್ಣದುಡಿಗೆಗಳಿಂದ
ಸೊಗಸುಗೊಳಿಸಿ
ನೆಲದೊಳೋಡಾಡಿಸದೆ
ಮಳೆಬಿಸಿಲ ತಾಕಿಸದೆ
ಗಳಿಗೆಯನ್ನೆಡೆಬಿಡದೆ
ಸೊಗದಿ ಪೊರೆದರ್‍.
ಒಲವದೆನುತಾನಂದು ನಾಂ ತಿಳಿಯದಾದೆ.

ಪಲಬಗೆಯ ತಿನಿಸುಗಳ
ತಲೆಯ ಮೇಲ್‍ ಪೊತ್ತಿಟ್ಟು
ನಿಲದೆ ಗಾವುದ ಮೂರ
ಭರದಿ ನಡೆದು
ಓದುವಾ ಮಗು ಮೆದ್ದು
ಮೊದವಡಲೆಂದು ಮಿಗಿ-
ಲಾದರದಿ ತಂದಿತ್ತು,
ಹರಸಿ ಪೋದರ್‍.
ಒಲವದೆನುತಾನಂದು ತಿಳಿಯದಾದೆ.

ದುಡಿದು ನಾಂ ಮನೆಗೆ ಬರ
ಲೊಡನೆ ನಸುನಗುತ ಬಂ-
ದಿಡುತ ಕೈಯೊಳು ಕೈಯ-
ನೊಡಲ ತಡವಿ
ಸವಿಯುಣಿಸ ನೀಡಿ ಮೃದು
ರವದಿ ಮಾತುಗಳಾಡಿ
ಎವೆಯಿಡದೆ ನೋಡಿ ತ-
ನ್ನೊಡಲ ಮರೆವಳ್‍.
ಒಲವದೆನುತಾನಂದು ತಿಳಿಯದಾದೆ.

ಮುಳಿಯಲಾಂ ಮುಳಿಯದರ್‍
ಪಳಿಯಲಾಂ ಪಳಿಯದರ್‍
ನಲಿಯಲಾಂ ಮೈಯುಬ್ಬಿ
ನಲಿಯುತಿರ್ದರ್‍.
ಅಳಿದರಾ ಜನರೆಲ್ಲ
ಕಳೆದುದಾ ಯುಗವೆಲ್ಲ
ಕಳವಳದೊಳಿಂದು ಪಾಲ್‍
ಕೊಳುವರಿಲ್ಲ.
ಒಲವು ತಾನೇನೆಂದು ತಿಳಿದೆನೀಗಳ್‍.

ನೋಡಿಹರುಷಿಪರಿಲ್ಲ
ನೀಡಲಾತುರರಿಲ್ಲ
ಪಾಡಿ ತಣಿಸುವರಿಲ್ಲ
ಇಂದದಾರುಂ.
ತೆರಳೆ ನಾಂ ಮನೆಯಿಂದ
ಮರೆಯಿನೀಕ್ಷಿಪರಿಲ್ಲ
ಅರಿತೆನ್ನ ಸಂತಯಿಪ
ಬಂಧುವಿಲ್ಲ.
ಒಲವು ತಾನೇನೆಂದು ತಿಳಿದೆನೀಗಳ್‍.