ಸೊಗಸಾವುದು? - ಕೇತಕೀವನ - ಡಿವಿಜಿ

ಘನದ ಮಿಂಚದು ಸೊಗಸೊ
ಮನೆಯ ಸೊಡರಿದು ಸೊಗಸೊ
ಸಸಿಯ ಬೆಳಕದು ಸೊಗಸೊ
ಪಸುಳೆ ನಗು ಸೊಗಸೋ
ನೀ ಮಾಡಿಹುದೆ ಸೊಗಸೊ ಮಾಡಿಪುದೆ ಸೊಗಸೋ?

ತಿಳಿನೀರ ತೊರೆ ಸೊಗಸೊ
ತಿಳಿದವರ ಮನ ಸೊಗಸೊ
ಗಿರಿಯಟವಿಗಳೆ ಸೊಗಸೊ
ಪುರವೀಧಿ ಸೊಗಸೋ
ನೀ ಮಾಡಿಹುದೆ ಸೊಗಸೊ ಮಾಡಿಪುದೆ ಸೊಗಸೋ?

ಕಾಯ ಯಂತ್ರವೆ ಸೊಗಸೊ
ರಾಯತಂತ್ರವೆ ಸೊಗಸೊ
ಮೊರೆವ ಕಡಲದು ಸೊಗಸೊ
ಕೆರೆ ಬಾವಿ ಸೊಗಸೋ
ನೀ ಮಾಡಿಹುದೆ ಸೊಗಸೊ ಮಾಡಿಪುದೆ ಸೊಗಸೋ?

ತನಿವಣ್ಣ ಸವಿ ಸೊಗಸೊ
ಮನೆವೆಣ್ಣೊಲವೆ ಸೊಗಸೊ
ತರಣಿತೇಜವೆ ಸೊಗಸೊ
ಗುರುಕೃಪೆಯೆ ಸೊಗಸೋ
ನೀ ಮಾಡಿಹುದೆ ಸೊಗಸೊ ಮಾಡಿಪುದೆ ಸೊಗಸೋ?